အစားအသောက် မီးလိုတောက်

ဒါက ညီမလေး ၀င်္ကပါ tag ထားတဲ့ အကြောင်းအရာလေးပါ။ သူ စ tagတုန်းက လွမ်းတဲ့ အစားအစာများတဲ့။ ကျမက နိုင်ငံရပ်ခြားမှာလည်း မဟုတ်၊ ဒီမှာတင်ဆိုတော့ ကြိုက်တာဝယ်စားလို့ ရနေတော့ ဘယ်အစားအစာကို လွမ်းရမှန်းမသိလို့ အကြောင်းအရာလေး ပြောင်းရေးလိုက်ပါတယ်နော်။ ကျမ ကြိုက်နှစ်သက်တဲ့ အစားအစာတွေအကြောင်းပဲ ပြောပြတော့မယ်။

ရခိုင်မုန့်တီ - ဘယ်လောက်ကြိုက်လဲ ဆိုရင် နေ့တိုင်းသောက်ရလည်း မရိုးနိုင်ပါဘူး။ ဒါပေမဲ့ ဟိုတလောတုန်းက နေမကောင်းဖြစ်လို့ အစပ်တွေ မစားရတဲ့ အချိန်တုန်းက ရှောင်လိုက်ရလို့ တပါတ်လောက် မစားဖြစ်လိုက်ဘူး။ အတော် လွမ်းခဲ့ရတဲ့ ကျမ အကြိုက် အစားအစာ တခုပါ။ စားမိပြီဆိုရင်လည်း ငရုတ်သီးတွေ အလွန်အကျွံထည့်စားရမှကို ကျေနပ်ပါတယ်။

ပဲကြာဇံသုပ် - သူက ရိုးရိုးအသုပ်လို မဟုတ်ဘူးနော်။ ရခိုင်သုတ်။ ဆီချက်တွေ ပဲမုန့်တွေ မပါပဲ ငရုတ်သီးအရည်နဲ့ ငါးဖတ်တွေကို ရောသုတ်ထားတာလေ။ စပ်သလားတော့ မမေးနဲ့။ အလွန့် အလွန်စပ်။ သူ့လည်း လွမ်းတာပဲ။ နေမကောင်းတော့ မစားရလို့။

ကြေးအိုး - သူများတွေ ကြေးအိုးဆီချက် ပိုကြိုက်ပေမဲ့ ကျမကတော့ ကြေးအိုးပဲကြိုက်တယ်။ ကြေးအိုးဆိုရင် ကလီစာတွေထည့်တာ မကြိုက်ဘူး။ အသားသက်သက်နဲ့ အရွက်များများထည့်ထားတာကို ကြိုက်တယ်။ ကျမ ကြေးအိုးတစ်ပွဲ စားရင် အမြဲတမ်း အသားဖတ်တွေ အများကြီးကျန်တတ်တယ်။ ကြေးအိုးကို ကြာဇံနဲ့ အရွက် ပိုအားထားပြီး စားလေ့ရှိပါတယ်။ ကျမ သူငယ်ချင်းတွေနဲ့ သွားစားရင် သူတို့က ကျမဆီက အသားတွေ အမြဲ ပိုစားရတယ်။ ခုဆို တုန်ယမ်းကြေးအိုး ပေါ်လာတော့ ပိုတောင် ကြိုက်သေး။ ချဉ်ချဉ်စပ်စပ်လေးနဲ့ အအီလည်း ပြေလို့လေ။ ကြေးအိုး စားပြီးတဲ့ည ဆိုလို့ကတော့ ရေအိုးဖက်ထားရပြီလေ။ တခါတုန်းကဆို အိပ်နေရင်းနဲ့တောင် လန့်နိုးတယ်။ ရင်တွေပူပြီး ရေတွေငတ်လို့ ထသောက်ရတယ်။ အော်… ကြေးအိုးကောင်းမှု။

မုန့်ဟင်းခါး - မနက်ပိုင်း breakfast စားမယ်ဆို မုန့်ဟင်းခါးပဲ စားချင်တယ်။ ဟိုတခါ သူငယ်ချင်းတွေနဲ့ မန္တလေးသွားလည်တုန်းကပေါ့။ ကျမတို့ တည်းတဲ့ ဟိုတယ်လ်က breakfast ကို buffet ကျွေးပါတယ်။ ဒီလောက် စားစရာတွေ များပြီး ထူးထူးဆန်းဆန်းတွေ အများကြီးထဲကမှ ကျမက မုန့်ဟင်းခါးကို ရွေးစားလို့ သူငယ်ချင်းတွေ ကတောင် ၀ိုင်းရယ်ကြတယ်။ နောက်နေ့ကျ သူတို့ buffet menu ထဲမှာ မုန့်ဟင်းခါး မပါတော့ အဲဒါမှ မစားရရင် မဖြစ်ပါဘူးဆိုလို့ မြို့ထဲပတ်ပြီး မုန့်ဟင်းခါး ရှာပုံတော်ဖွင့်ရတယ်။ အချိန်ကလည်း နည်းနည်း နောက်ကျနေပြီ ဆိုတော့ ရှာလိုက်ရတာ။ တွေ့တော့တွေ့ပါရဲ့။ မကောင်းလိုက်တဲ့ အရသာ။ ပဲတွေများပြီး ဘယ်လိုမှကို မုန့်ဟင်းခါး အရသာ မပေါက်ဘူး။ ချိုတိုတိုကြီးနဲ့ မသိရင် အုန်းနို့ခေါက်ဆွဲကျနေတာပဲ။

ကော်ဖီ - ဒါကတော့ ကျမ အတွက် မရှိမဖြစ်ပေါ့။ မနက်ဖက်ဆိုရင် ကော်ဖီတခွက်သောက်ရရင် လုံလောက်တယ်။ အရမ်းလည်း ကြိုက်တယ်။

ဒီလောက်ပဲနော်။ ရေးရင်းနဲ့ ဗိုက်ဆာလာလို့ ထမင်းသွားစားလိုက်ဦးမယ်။ :)

ဘယ်သူက ဘာကောင်လဲ

ကျမညီမလေး မေပျို tag ထားတာလေးပါ။ အပျင်းကြီးနေတာနဲ့ စာလည်းမရေးဖြစ်ပါဘူး။ ညီမလေး tag တော့မှပဲ ပြန်ရေးဖြစ်တော့တယ်။ ငါဘာကောင်လဲတဲ့။ tag တတ်လိုက်ကျတာနော်။ ဒီတော့လည်း ပြောရချည်သေးရဲ့။ ဖတ်ပြီး ထမင်းစားချင်စိတ် ပျက်က တာဝန်မယူပါ။

ရုပ်ရည်သွင်ပြင်လေးက အရင် စပြောရအောင်နော်။

မျက်လုံး - အရမ်းလှတယ်လို့တော့ မျက်မှန် အနက်ကြီးတပ်ထားရင် ပြောကြတာပဲ။ ဒါပေမဲ့ မျက်လုံး တစ်ဖက်စီက သူငယ်အိမ် နှစ်ခုက တယောက်နဲ့ တယောက် ရန်ဖြစ်ထားတော့လေ တယောက်က အပေါ်ကြည့်ရင် နောက် တယောက်က ဘေးကိုကြည့်တယ်။ အချင်းချင်း အရွဲ့တိုက်ကြတာလေ။ သူတို့လုပ်တာနဲ့ ကျမမှာ မျက်စိစောင်းနေတယ် ဆိုပြီး အပြောခံရပါလေရော။ ခက်တယ်နော်။

မျက်ခုံး - အများနဲ့ မတူ အလှဘွဲ့ယူမှာနော်။ အထင်တော့ မသေးနဲ့။ လှချင်လွန်းလို့ လက်စွမ်းပြမိပါတယ်။ လက် အရှိန်လွန် သွားလို့ တပိုင်းပြတ်နေတဲ့ မျက်ခုံးမွှေး စတိုင်လ်လေးက တမျိုးတော့ အထူးသား။ ကြိုက်ပြီး လိုက်လုပ်တော့မယ် မဟုတ်လား။ သိနေတယ်လေ။ အဟတ်ဟတ်…

နှာခေါင်း - သူလည်း သူ့ဟာသူတော့ လှတာပဲ။ ကျမ ဘေးတိုက် ရိုက်ထားတဲ့ ဓါတ်ပုံကို ကြည့်ပြီး သူလေး ကတောင် ပြောသေးတယ်။ ခြေတံလေးကို စင်းနေတာပဲတဲ့။ မယုံမရှိနဲ့နော်။ နှာခေါင်းဆိုတာ မျက်စိနှစ်လုံးခြားမှာ။ ဟီးဟီး။

ပါး - ၀က်ခြံတွေ အပြွတ်လိုက် ထွက်နေတာနဲ့ အဆီတွေပြန် တတ်တာက လွဲလို့ အတော် စွဲဆောင်မှုရှိတဲ့ ပါးလေးပါ။ တခါတလေ လက်နဲ့ ဆိတ်မိဆွမိလို့ ရောင်ကိုင်းနေတဲ့ အချိန်လေးက လွဲပြီး အခြား အချိန်ဆို လူတိုင်း နှစ်ခါပြန် လှည့်ကြည့်ခံရလောက်အောင် လှတာ။ အဟုတ်။

နှုတ်ခမ်း - အဆိပ်သင့်တဲ့ နှုတ်ခမ်းလို့ သူများတွေက ချစ်စနိုးလေး ခေါ်ကြတယ်။ ဘာလို့လဲ သိလား။ နှုတ်ခမ်းနီ အကုန်ခံပြီး ဆိုးနေစရာကို မလိုဘူး။ နဂို အော်ရီဂျင်နယ်ကိုက ညိုပုပ်ပုပ် အရောင်လေး။ ကဲ ဘယ်လောက် ကဗျာ ဆန်လိုက်လဲနော်။

သွား - ငယ်ငယ်ထဲက သွားပိုးတွေ စားပြီး နှုတ်ထားရလို့ မဆိုသလောက်လေး နည်းနည်းတော့ ကျဲတယ်။ သွားပိုးစားနေတာတွေသာ အကုန်နှုတ်ရရင် ဖွားဖွားကြီးရုပ်ပေါက်သွားမှာ စိုးလို့ ရှေ့သွားလေးတွေကို ပိုးစားနေတဲ့ အတိုင်း နယ်ထရယ်လေးပဲ ထားလိုက်တော့တယ်။ သိတယ်မဟုတ်လား။ နယ်ထရယ် ဘူးသီး ဘယ်လောက် တန်ဖိုးရှိတယ်ဆိုတာ။

ဆံပင် - အတွေးနည်းနည်းလွန်ပြီး အရွယ်မတိုင်ခင် ဖြူကုန်တာနဲ့ ခုခေတ် ဟိုက်လိုက်လုပ်တာနဲ့ သွားတိုက်ဆိုင်နေတော့ ဂွင်ပေါ့။ မသိရင် ဟိုက်လိုက်လေးတွေပဲ ဖောက်ထားသလိုလို ဘာလိုလိုနဲ့ ချောလဲ ရောထိုင်ပေါ့။ ဘယ်သူမှ ပြောရဘူးနော်။ ဒီက ခင်လို့ ပြောပြတာ။ လျှို့ဝှက်ချက်တွေကို ဘယ်သူမှ သိတာ မဟုတ်ဘူး။ ရှူးတိုးတိုး။

ဘော်ဒီရှိပ် - ရေးရမှာ ပျင်းတယ်ကွာ။ ကိုယ့်ဖာသာကိုယ်သာ တွေးကြည့်လိုက်တော့။ ဂျနီဖာ အင်နက်စတန် ( Jennifer Aniston ) လိုမျိုးလေးလို့ တွေးလည်း စိတ်မဆိုးဘူးနော်။ တကယ်… ဒီက အရမ်း သဘောထားကြီးတာ။ တွေးကြည့်တာနဲ့တင် သိတယ်မဟုတ်လား။

ကဲ ရုပ်ရည်သွင်ပြင်ကတော့ ဒီလောက်ပါပဲကွယ်။ ခုဆိုရင် ကျမ Helena ဘယ်လို အလှအပတွေ ပိုင်ဆိုင်တယ်ဆိုတာ အားလုံးပဲ သဘောပေါက်လောက်ရောပေါ့။ ထမင်းစား ပျက်သွားမယ်ဆို တာဝန်မယူဘူးနော်။ ဒီက အစကတည်းက ကြိုပြောပြီးသား။ စိတ်နေစိတ်ထားလေး ဆက်လိုက်ကြဦးစို့။

သောကြာသမီးဆိုပေမဲ့ ကိုယ်နဲ့ စကားပြောရတာ သိပ်ကီးမကိုက်တဲ့ သူနဲ့ဆိုရင် တခွန်းက နှစ်ခွန်းပြောရမှာတောင် စိတ်သိပ်မပါဘူး။ အော်.. အဆင်ပြေတဲ့သူနဲ့ ဆိုရင်လား။ ပြောမနေပါနဲ့တော့… အသားကုန် လွှတ်တာ။ သူအားတာ မအားတာ နားမလည်ဘူး။ ကိုယ်ပြောချင်တာ ပြောရဖို့က အဓိက။ အဲလို အလိုက်ကန်းဆိုးသိတာနော်။

မေ့တတ်တာကလည်း တရားလွန်ပါပဲ။ အဓိက အနေနဲ့ကတော့ သူများဆီက ပိုက်ဆံချေးပြီးရင် လုံးဝကို မမှတ်မိတော့တာပဲ။ ကိုယ့်ဆီက ချေးတာမျိုးကျတော့ အမေ့ကို မှတ်ခိုင်းထားလိုက်တယ်။ အဲဒါ စိတ်အချရဆုံးပဲလေ။

အရမ်းလည်း ချိုးခြံချွေတာ တတ်သေးတယ်။ ဒါကို မနာလိုသူတွေက ကပ်စီးနည်းတယ်ရယ်လို့ ကဲ့ရဲ့တတ်ကြသေးတယ်။ ဂရုမစိုက်ပါဘူး။ အော် ဟုတ်တယ်။ အဲလို သူများတွေ ကိုယ့်ကိုထင်တဲ့ အထင်တွေကိုလည်း လိုက်ပြီး ဂရုမစိုက်တတ်ပြန်ပါဘူး။

ကိုယ်လုပ်စရာ ရှိတဲ့ ကိစ္စကို နောက်ကနေ ` လုပ်လေ… လုပ်လေ.. ´ နဲ့လိုက်ပြီး တွန်းနေရင် အရွဲ့တိုက်ပြီး ပိုကြာအောင် အချိန်ဆွဲထားပြီးမှ လုပ်တတ်တယ်။

ကျန်တာတွေကတော့ အများကြီးပေါ့။ ဘာမှန်းမသိ ညာမှန်းမသိ ရမ်းသမ်းပြီး အီစီကလီထုတာတွေကို မုန်းတယ်။ ဘာမှ မခက်တဲ့ ခပ်လွယ်လွယ် ကိစ္စလေးတွေကို ဘယ်လိုမှ ရှင်းပြလို့ မရအောင် ဥာဏ်တိန်နေတတ်တဲ့ သူမျိုးဆို စိတ်လေတတ်တယ်။ ဒီလောက်ပဲကွယ်။ တော်ပြီ။ ဒီလောက် ကိုယ်ပေါင်ကိုယ် လှန်ထောင်းပြတာနဲ့တင် ကျေနပ်ကြပါလို့။

ယုံချင်ယုံ မယုံချင်လည်း ယုံ

ကျမကို မလင်း tag ထားတဲ့ စာလေးရေးဖို့ အတော် ကြာနေပြန်ပါပြီ။ ကျမမှာလည်း အရမ်း စိတ်ညစ်စရာ ကိစ္စနဲ့ ကြုံနေရလို့ ဘာမှ မလုပ်ချင် မကိုင်ချင်အောင် ပါပဲ။ ဇာတ်လမ်း ကတော့ စပြန်ပြီနော်။ စာလေး စရေးခါစ ရှိသေးတယ်။

` ဒေါက်… ဒေါက်… ဒေါက် ´

` ဘယ်သူလဲဗျို့´ ကျမ တီးတိုး အော်မေးလိုက်၏။

` အချစ်ပါ ´ သူကလည်း နှစ်ကိုယ်ကြား အသံနဲ့ ပြန်အော်ပြော သရှင့်။

အချစ်လားဟေ့ ၀င်ခဲ့လေကွယ် လို့ ပြန်ပြောလိုက်ရ ကောင်းမလား စဉ်းစားပြီးမှ မဖြစ်ချေပါဘူး ဆိုပြီး

` အင်း အထဲ က ချက်ထိုးထားတာ ဖွင့်ပြီးဝင် ခဲ့လေကွယ် ´

` အဟင်း ´

အောင်မလေး လန့်လိုက်တာ… ဘယ်တုန်းက ဘေးနားရောက်နေမှန်း မသိတဲ့ အချစ်ကြီး။ သူများတွေရော မြင်ဖူး ကြလား မသိပါဘူး။ အဲဒီ့ အချစ်ဆိုတဲ့ အရာကြီး။ သူ့ပုံစံက ခပ်ဆန်းဆန်းရယ်… လေးထောင့် စပ်စပ် ၀ိုင်းဝိုင်း ခပ်ရှည်မျောမျော နဲ့ ပုကွကွ ပိစိညှောင့်တောင့် ဟပ်ပလုတ်ကြီး။ ဘယ်လိုကြီးမှန်းကို မသိတော့ ပါဘူး။ ကျမလည်း ရုတ်တရက် လန့်ဖြန့်သွားပြီး…

` ဘာ အဟင်းလဲ… ရှင်က ဘာကြီးတုန်း ´

` အချစ်လေ… ဒို့က အချစ်ပါ ´

` ယောင်္ကျားလား မိန်းမလား ´ ဟု ကျမ လွှတ်ခနဲ တလုံးချင်း ရေရွတ် လိုက်မိသည်။

` ယောင်္ကျား မိန်းမ ´

အယ်… ဘယ့်နှယ့်တုန်း… အချစ် ပြန်ဖြေတဲ့ စကားကြောင့် ကျမတောင် ကြောင်သွား၏။ ကြောင်သွားတော့ ခြေသံ မကြားရဘူးပေါ့။ ကျမဆီက ဘာအသံမှ ဆက်ထွက်မလာတော့ အချစ်ကပဲ ဆက်ရွှီးလေသည်။

` အော်… မိန်းမ ဖြစ်ဖြစ် ယောင်္ကျားဖြစ်ဖြစ် ဘယ်သူ့မှာမဆို အချစ်ရှိတယ် မဟုတ်လား… ဒါကို ပြောတာပါ ´

` နေပါဦး အချစ်က ကျမဆီလာတာ ဘာကိစ္စရှိလို့လည်း ပြောလေ… ဒီမှာ ကျမ မအားဘူး စာရေးစရာ ရှိသေးတယ် ´ လို့ အလောသုံးဆယ် ဖြည်းဖြည်းချင်း ပြောလိုက်တော့ အချစ်က

` ခက်ပြီ… အချစ်က ဘာ ကိစ္စ ရှိရမှာလဲ… Helena ရဲ့ စိတ်ထဲမှာ နေရတာ ကျဉ်းကျပ်လို့ ခဏလေး အပြင်ကို လေခံညှင်းရင်းနဲ့ လမ်းလျှောက်ထွက်ပြီး ပြန်လာတာလေ… ဒီကောင်မလေးနှယ် ကြောင်တောင်တောင် နိုင်လိုက်တာလွန်ရော… အဟွန့် ´

ခက်တော့နေပြီ… ဘာမှန်းမသိတာကြီးက လာနုနေပြန်ပါ၏။ အော်… ဒီအချစ်ကလည်း ပေါက်ပေါက်ရှာရှာ လမ်းလျှောက်သလား နေတာတဲ့လား… ဒါကြောင့် ခုရက်ပိုင်းအတွင်း စိတ်ထဲမှာ ဟာတာတာ နဲ့ လေးပင် နေတာကိုး။ ကျမအတွေး မဆုံးခင်မှာပဲ…

` ဒါနဲ့လေ အချစ် အခု လမ်းလျှောက်ထွက်ရင်း လမ်းမှာ အမုန်းနဲ့ ခင်လာတယ်… အဲဒါ သူကလဲ ဘယ့်သူ့စိတ်ထဲ နေရမှန်း မသိ ဖြစ်နေတာနဲ့ အချစ် သူ့ကိုပါ တပါတည်း ခေါ်လာခဲ့တယ်… Helena လက်ခံမယ် မဟုတ်လားဟင်… လက်ခံမှာပါ… အချစ်သိတယ်.. အမုန်းရေ အမုန်း လာလေကွယ်… အထဲက ပိတ်ထားတဲ့ ချက်ကို ငါ ဖွင့်သလိုပဲ ဖွင့် ၀င်လာခဲ့ ´ သူ့ စကားဆုံးမှ ကျမ အသိပြန်ဝင် လာတော့သည်။ ဘယ်ဖြစ်မလဲနော်… အမုန်း ကိုပါ လက်ခံ ဖို့ဆိုတာ။

` ဟာ မဖြစ်သေးဘူးလေ… လူသာ လာပါ။ ဧည့်သည် ခေါ်မလာပါနဲ့ ဆိုတာ မကြားဖူးဘူးလား ´ ကျမလည်း ပြီးပြီးရောလျှောက်ပြီး သတိနှင့် ပြောလိုက်၏။

` အဟွန်းဟွန်း မရတော့ဘူးကွယ့် အမုန်းက ဒီဘက်ဘေး ရောက်နှင့်နေပြီလေ ´ ခြောက်ခြားစရာ ဆည်းလည်းသံလို ချိုလွင်လွင်ကြီးနဲ့… ကျမဘေးကို ကြည့်မိတော့ အသံထက် မြန်ပုံရတဲ့ အမုန်းကြီးက ဘေးမှာရပ်လို့… ခုတော့ ကျမရဲ့ နံဘေး တဖက်တချက်စီမှာ အချစ် နဲ့ အမုန်း က အတူ ယှဉ်တွဲ ၀န်းရံလျှက်… ။

` သွား လူဆိုး… ´

ဘာမှ မဆိုင်ပေမဲ့ ကျမ သွေးပျက်စွာ ပြုံးစိစိ မျက်နှာပေးနဲ့ ငြင်းလိုက်သည်။

သို့သော်…. အရာရာ က နောက်ကျခဲ့ပြီ။ ကျမ စကား မဆုံးသေးခင်မှာပဲ ကျမ ခေါင်းပေါ် ကျရောက် လာတဲ့ အေးစက်စက် အထိအတွေ့ကြောင့် နားထင် နှစ်ဖက်စလုံးကို မီးစနဲ့ ထိုးခံလိုက်ရသလို အေးခနဲ ဖြစ်သွားတာသာ မှတ်မိလိုက်တော့သည်။ ယောင်ရမ်းပြီး အတင်းပြူးထားတဲ့ မျက်စိ ပြန်ဖွင့်လိုက်တော့ ဘေးက အချစ်ရော အမုန်းရော ကျမအနားမှာ မရှိကြတော့ပဲ အခန်းထဲမှာ တယောက်ထဲ တိတ်ဆိတ်လို့… ။ အော်… လက်စသတ်တော့ ကျမ အိပ်ပျော်ရင်းနဲ့ စာရေးနေခဲ့တာကိုး… ။

ဒါပေမဲ့ ထူးထူးခြားခြား ရင်ထဲမှာတော့ သိပ်အသားမကျ သလို ဖြစ်နေတဲ့ နာကျင် လေးလံမှုနဲ့ အတူ… ။ တစုံတယောက် အပေါ် ဘယ်တုန်းကမှ မထားခဲ့ဖူးတဲ့ နာကျည်းမှု အရိပ် ခပ်ပါးပါးဟာ သက်ပြင်း တချက် အဖြစ် ကျမရဲ့ ထွက်သက်အရှိုက်မှာ မျောပါသွားကြလေရဲ့။

မီးမီးကြောက်ကြောက်

ကျမရဲ့ ညီမလေး မေပျိုက tag ထားတာပါ။ ခုဆို အကြွေးတွေများနေပြီ။ tag ထားပြီးမရေးရသေးတာတွေ ရှိနေသေးတယ်။ နည်းနည်းကြာရင် စိတ်မဆိုးကြပါနဲ့လို့ တောင်းပန်ထားမယ်နော်။ ခုတော့ အကြောက်ဆုံး သတ္တ၀ါ အလှည့်ပေါ့။ ကျမအရမ်းကြောက်တာကတော့ ပင့်ကူပါ။ ပင့်ကူကို ဘယ်နေရာမှာ ဘယ်လိုပုံစံနဲ့ တွေ့တွေ့ သေအောင်ကြောက်တယ်။ ကိုယ့်ကို အန္တရာယ်မပြုဘဲ နံရံမှာကပ်နေတဲ့ကောင်ဆိုလည်း ကြောက်တယ်။ သူ့ဟာသူ တနေရာမှာကပ်နေရာက နောက်တနေရာ ပြောင်းဖို့ ကားယားကြီးသွားနေတာ တွေ့မိရင်လည်း ကြောက်တယ်။ ကိုယ့်ခြေထောက်တို့ဘာတို့မှာ နည်းနည်းယားကျိကျိဖြစ်သွားတာနဲ့ စိတ်ထဲပြေးမြင်မိတာ ဒီပင့်ကူပဲ။ အား… ခနဲအော်ပြီးငုံ့ကြည့်လိုက်တော့လည်း ဘာမှမဟုတ်ဘူး။ ဒါဆို ကျမ အမေက ဆူပြန်ရော။ ကျမက စိတ်ထဲတွေးပြီးကြောက်လို့အော်တာ။ အိမ်ကလူတွေကကျတော့ ကျမအသံကိုကြားပြီး လန့်လို့။

အဲဒီ့ကောင်ကို ကြည့်မိရင် စိတ်ထဲဘယ်လိုဖြစ်မှန်းကို မသိဘူး။ အသဲတွေယားပြီး ကြက်သီးတွေထလို့ထနဲ့။ ကိုယ့်ရှေ့သွားကြီးလာဖြဲပြီး မာန်ဖီနေတဲ့ ခွေးဆိုလည်းကြောက်မှာပဲလေ။ ဒါပေမဲ့ ပင့်ကူကိုကျတော့ ဘာမှအပင်ပန်းခံပြီး ဖြဲခြောက်စရာမလိုအောင် ကျမက ကြောက်ပြီးသား။ ဘယ်တုံးက ဘယ်လိုအဲဒီ့လောက် ကြောက်တတ်သွားလဲ မမှတ်မိတော့ပါဘူး။

ဆယ်တန်းတုန်းကဆိုရင် ကျမညသန်းခေါင်ထိစာကျက်ပြီး အပျင်းပြေ မဂ္ဂဇင်းလေးဖတ်မယ်ဆိုပြီး အနားရှိတဲ့ စာအုပ်လေး ကောက်လှန်လိုက်မိပါတယ်။ တိုက်တိုက်ရယ်တဲ့ မှ ဆိုင်ဆိုင် လေ။ ဖွင့်ဖွင့်ချင်း စာမျက်နှာမှာ ပင့်ကူအကြီးကြီးတကောင်က လူတယောက်မျက်နှာမှာ ကပ်နေတဲ့ပုံကြီး။ အားပါးပါး… ။ ဘယ်ရမလဲ ကျမပဲလေ။ `အား….´ ဆိုတဲ့ အသံနက်ကြီးနဲ့ စာအုပ်ကို ပစ်ပေါက်ပလိုက်တာ…။ ကျမစာကျက်တာကို မှေးပြီးစောင့်နေတဲ့ ကျမအမေကို တည့်တည့်မှန်ပါရော။ အမေကလည်း ရုတ်တရက်ဆိုတော့ အရမ်းလန့်ပြီး ဘာဖြစ်တာလဲဆိုပြီး အကြောင်းရင်းရှာတော့ အဲဒီ့ပင့်ကူပုံကြီးကြောင့်မှန်းသိတော့ ဆူခံလိုက်ရတာ။ ညသန်းခေါင်ကြီး ဒီလောက်တောင် ထအော်ရလားလို့ပေါ့။

အရင်က ကျမတို့အိမ်မှာက ပင့်ကူဆိုလို့ သေးသေးမျှင်မျှင်နဲ့ ပိန်ပိန်လေးတွေပဲရှိတာ။ ဒါပေမဲ့ သူများအိမ်တွေကနေ ရောက်လာတာနေမှာပေါ့။ ခုဆို မဲမဲနဲ့ ကားယားကောင်ကြီးတွေ တခါတခါတွေ့ရတတ်တယ်။ ပင့်ကူနဲ့ဖြစ်တဲ့ နောက်ပြဿနာ တခုရှိသေးတယ်။ အဲဒီ့နေ့တုန်းက ကျမအမေက သူ့အင်္ကျီ လှမ်းထားတာ အခန်းထဲယူလာခဲ့ပါတဲ့။ ဒါနဲ့ ချိတ်ကလေးကနေ ဆွဲပြီး ယူလာလိုက်တာ အခန်းထဲလည်းရောက်ရော အမေက ကျမရဲ့လက်ထဲက အင်္ကျီကိုကြည့်ပြီး `ငြိမ်ငြိမ်နေ.. အဲဒီ့နားမှာပဲ ခဏလေး ငြိမ်ငြိမ်နေ´ တဲ့။ ဒီလောက်ဆို ကျမတို့က သဘောပေါက်ပြီးသား။ အမေ့စကားဆုံးတာနဲ့ ဘယ်ရမလဲ သူ့ အင်္ကျီကို လွှတ်ပစ်လိုက်ပြီး အသံပြဲကြီးနဲ့ အော်လည်းအော် ခုန်လည်းခုန်လိုက်တာ။ အနားမှာရှိတဲ့ ခုတင်ပေါ်ကိုရောက်နေပြီ။ ဒါတောင် ခြေထောက်ကို ပင့်ကူတက်လာမှာတွေးပြီး ကဆုန်ပေါက်နေလိုက်တာများ။ အနည်းဆုံး ၃မိနစ်လောက်ကြာမယ်။ ၀ုန်းဒိုင်းကို ကျဲနေတာပဲ။ အမေကလည်း ကျမကြောက်မှန်းသိတော့ ဆေးဗူးနဲ့ လိုက်ဖြန်းပေးရှာပါတယ်။ သေပြီဆိုတာတောင် ကျမက ခပ်ရွံ့ရွံ့နဲ့ အောက်မဆင်းရဲသေးလို့ ဆူခံရသေးတယ်။ တော်တော် ဒုက္ခပေးတဲ့ ပင့်ကူ။ မုန်းစရာကြီး။ ကျမကလည်း ကျမပဲ။ အဲဒီ့ပင့်ကူဆို တွေ့လိုက်တာနဲ့ ရင်တွေတုန်… ချွေးစီးတွေပြန်… အသက်ရှုတွေမမှန်နဲ့။ ဘာဖြစ်မှန်းကိုမသိပါဘူး။

အမေပြောသလိုပဲ `သူက ဘာလုပ်လို့လဲ သူ့ဟာသူ နံရံမှာကပ်နေတာ… နင့် ကိုယ်နင်နဲ့လည်း ယှဉ်ကြည့်ဦး… ဟိုက သေးသေးလေး ကိုယ် တက်နင်းလိုက်ရင်တောင် သူ့ခမျာ သေရရှာမှာ…´ တဲ့။ အောင်မလေး တက်လည်းမနင်းရဲပါဘူး။ တက်နင်းဖို့ နေနေသာသာ စေ့စေ့တောင် မကြည့်ရဲပါဘူး။ အဲဒီ့လောက်ကို ကြောက်ပါတယ်။ ကြောက်တယ် ကြောက်တယ်။ :P

အိတ်ထဲမှာ…

ညီမလေး နှင်းသဇင်က အိတ်ထဲမှာ ဘာရှိလဲ tag ထားတာ ၂ရက်လောက်တောင် ရှိရောပေါ့။ မမအပျင်းထူနေတာနဲ့ နည်းနည်းကြာသွားတာ ဆောဒီးညီမလေးရေ။ ကဲစလိုက်ကြစို့။

- ဖုန်းစာအုပ် ( ကျမရဲ့ ဦးနှောက်က ၆လုံးလောက်ပဲရှိတဲ့ အိမ်ဖုံးတွေကိုတောင် အလွတ်မရတာ… ခု ဂဏန်း၉လုံးပါတဲ့ ဟန်းဖုန်းနံပါတ်တွေ မှတ်မိဖို့ဆိုတာ…. မလွယ်ရေးချ မလွယ်ပါဗျို့)

- ကြည့်မှန်ခပ်ကြီးကြီး ( မျက်နှာအပြည့်မမြင်ရတဲ့ မှန်သေးသေးလေးနဲ့ဆို ကြည့်ရတာအားမရလို့… ဟုတ်တယ်လေ… မှန်ကြည့်ပါတယ်ဆိုမှ မျက်နှာတခုလုံး သေချာမြင်ရမှပေါ့လို့ :P အကျည်းတန် မှန်ကြိုက်လို့ပြောနဲ့နော် ငိုမှာ… )

- ဘီးလှလှလေး ( သံချောင်းလေးတွေနဲ့ ကျန်းမာရေးဘီးလို့ ရောင်းတဲ့ဆိုင်ကပြောတာပဲ… ဟုတ်မဟုတ်တော့ မသိဘူး… Helena ကို ဒီလိုလိမ်ရောင်းရတာ လွယ်တယ်နော့ )

- Camella Baby Cake ( Baby Cake ဆိုလို့ ကလေးစားတဲ့ ကိတ်မုန့်တော့ မထင်လိုက်ပါနဲ့… ပေါင်ပေါင်ရိုက်တဲ့ဟာကိုပြောတာ :P )

- ဘောလ်ပင် ( သူက အဖုံးနေရာမှာ ဓါတ်မီးလေးပါတယ်… အရမ်းအလင်းကြီးမဟုတ်ပေမဲ့ ဘာမှမမြင်ရအောင်မှောင်တဲ့ လှေကားလိုနေရာမျိုးကျတော့ အသုံးတည့်သား… နောက်ပြီး ဘောလ်ပင်ကိုယ်ထည်မှာက ကျမအကြိုက် Emily ကာတွန်းပုံနဲ့ အရိုးခေါင်းပုံလေးတွေပါလို့ ရေးရမှာတောင် နှမြောတယ်… ကုန်သွားမှာစိုးလို့ )

- မျက်မှန် ( နေကာမျက်မှန်ဟုတ်ဘူးနော်… ပါဝါနဲ့ဟာ… ဒါပေမဲ့ အဲဒီ့လောက်ကြီးတော့ မများပါဘူး… ဆရာဝန်ကတက်ခိုင်းလို့သာ တက်ရတာ… နှာခေါင်းမှာ အရာကြီးထင်သွားမှာစိုးလို့ မတက်တာများတယ်… ကွန်ပျူတာသုံးတာများလို့တက်ရပါတယ်ဆိုမှ ခုစာရေးတော့ မေ့ပြီးမတက်ထားမိပြန်ဘူး… သွားယူလိုက်ဦးမယ် )

- Lip Balm ( အရင်ကတော့ Lip Gloss သုံးတာပေါ့… သူက လေတိုက်ရင် ဆံပင်တွေ လာလာကပ်တာနဲ့ ဖယ်ရတာအလုပ်ရှုပ်လို့… ပဲများဖို့ ဆိုးပါတယ်ဆိုမှ သူ့ကိုဖယ်နေရတာက အလုပ်တလုပ်… ခုတော့ Lip Balm နဲ့ အဆင်ပြေသွားပြီ… နှုတ်ခမ်းကွာတာတွေ ဘာတွေလည်း ပျောက်တယ်… ပဲများလို့လဲရတယ်… ကဲ မပိုင်ဘူးလား )

- ရေမွှေး sample ( sample ဆိုလို့ အလကားရတယ် မထင်နဲ့နော်… အိတ်ထဲဆောင်ထားဖို့ တမင်ဝယ်ထားတာ… အိမ်က ဆွတ်လာတဲ့ ရေမွှေးအနံ့ နည်းနည်းပျယ်ပြီလို့ ထင်တာနဲ့ ထုတ်ပြီးသမ တာ… )

- Lotion ဘူးသေးသေးလေး ( လက်ဖ၀ါးတွေ ခြောက်ရင်လိမ်းဖို့ အမြဲ ထည့်ထားတာ… အဲဒါ ကျမရဲ့ အမလက်ဆောင်ပေးထားတာလေ.. သူလည်း sample လိုခပ်သေးသေးပဲ… အိတ်ထဲထည့်ဖို့ ပိုအဆင်ပြေတာပေါ့ )

- ရှောက်သီးဆေးပြား ( ကြုံရင် လျှောက်ရောင်းမလားလို့… ဟဲဟဲ )

- Streptsil ငုံဆေး ( ဒါကတော့ ခုတလောမှ ကျမအိတ်ထဲရောက်လာတာ… လည်ချောင်းအရမ်းနာပြီး ချောင်းဆိုးလို့လေ… သူက vitamin c အပြည့်ပါတယ်တဲ့… အရသာကတော့ ပူရှိန်းချဉ်ချဉ်လေး… )

- တစ်ရှုး နဲ့ လက်ကိုင်ပုဝါ ( လက်ကိုင်ပုဝါရော၊ တစ်ရှုးရော ထည့်ထားလို့ မျက်စိလည်သွားပြီဟုတ်… ဒါကဒီလို ရှိတယ်လေ… ခုတလော နှာစီးနေတော့ တစ်ရှုးနဲ့ဆို တွက်ခြေမကိုက်လို့ လက်ကိုင်ပုဝါပါ ထပ်အားဖြည့်ထားတာ… )

- wallet ( ဒီ အိတ်က တော်တော်တောင် ဟောင်းလို့ ဒေါင့်တွေတောင် ဆုတ်နေပြီ… ကြိုက်လွန်းလို့တော့ မဟုတ်ပါဘူး… အသစ်ဝယ်ရမှာ နှမြောလို့ )

ဒါပဲ… ကုန်ပြီ… ချမ်းသာတာ ဒါအကုန်ပဲ။

ဆောင်းတွင်းအေးအေး

ဆုဝေက သူ့ကိုလာ tagတဲ့ ဆောင်းတွင်းအေးအေးဆိုတဲ့ အကြောင်းရေးပြီးပြီးချင်းပဲ ပြန်tag မယ်တဲ့… ဆောင်းတွင်းအေးအေးဆိုရင် ဒီဇင်ဘာလဲပါမှဖြစ်မယ်လို့ ပြောလည်းပြော tag လည်း tagပဲ… စိတ်ကူးနဲ့ စာစီကြည့်တော့ကျ အကြံဥာဏ်တွေတောင် အိုက်စပ်စပ်နဲ့… ဘာပဲဖြစ်ဖြစ်ပေါ့လေ… ဆောင်းတွင်းအေးအေး အကြောင်းကို ယပ်တောင်လေး တဖျတ်ဖျတ်နဲ့တော့ ရေးရသေးတာပေါ့…

မိဘ၀တ်ပေးသမျှနဲ့ ကျေနပ်တတ်တဲ့ ငယ်ငယ်တုံးကကျတော့ အေးလိုက်တဲ့ ဆောင်းရာသီ… ဆွယ်တာလှလှလေးတွေနဲ့ ရှိုးပေးဖို့ သိလာတဲ့အရွယ်ကျတော့ တမင်တကာ အရွဲ့တိုက်တာကျနေတာပဲ အေးကိုမအေးတော့ပါဘူး… ၀ယ်ထားတဲ့ မာဖလာလှလှလေးတွေ လက်အိတ်တွေထုတ်ဝတ်ပြီး ပဲများကြည့်ရင် ကိုယ့်ပစ္စည်းနဲ့ ကိုယ်တောင်မှ ကိုရီးယားရူးလို့ အပြောခံရဦးမှာ သေချာတယ်… တကယ်တော့လေ.. ဆောင်းရာသီကို ကျမအချစ်ဆုံးပဲ… ကျမရဲ့ မွေးလလည်း ဖြစ်တဲ့ ဒီဇင်ဘာမှာ နှင်းတွေဖွေးနေအောင်ကျရင် အရမ်းကောင်းမှာပဲလို့ အမြဲစိတ်ကူးယဉ်မိတယ်… ရန်ကုန်မှာ ကျတတ်တဲ့ နှင်းမျိုးမဟုတ်ဘူးနော်… မိုးရွာသလိုကို အဖတ်လိုက်ကျတဲ့ နှင်းမျိုးကျဖို့ စိတ်ကူးယဉ်မိတာ… ရန်ကုန်မှာက ဒါဟာလုံးဝမဖြစ်နိုင်တဲ့ ကိစ္စပဲနော်… အနည်းဆုံးတော့လေ ရုပ်ရှင်ကားတွေထဲမှာပဲ မြင်ဖူးတဲ့ နှင်းထုကြီးထဲမှာ လမ်းတော့လျှောက်ချင်မိသား… တယောက်ထဲတော့ ဘယ်ဟုတ်ပါ့မလဲနော်… (ဟီးဟီး) ဒါကတော့ တနေ့နေ့ပေါ့…. ရေးရင်းနဲ့ အကြောင်းအရာတွေတောင် ဘေးချော်ကုန်ပြီ…

ခုအချိန်ထိ ကျမ မှတ်မိနေသေးတဲ့ ဆောင်းတွင်းတွင်းအေးအေးလေးက ဟိုးလွန်ခဲ့တဲ့ ငါးနှစ် ခြောက်နှစ်လောက်က ကျိုက်ထီးရိုးဘုရားဖူးသွားခဲ့တဲ့ အချိန်လေးပါ… အဲဒီ့နှစ်တုံးက ကျမရဲ့ အဒေါ်တွေ နေထိုင်တဲ့ လမ်းကလူတွေ အကုန်စုပြီး ဆွမ်းကြီးလောင်း အလှုပွဲအောင်မြင်တဲ့ အနေနဲ့သွားတဲ့ အမှတ်တရခရီးလေးပါ… ကားတစီးလုံး ကိုယ့်အသိတွေချည်းပဲဆိုတော့ ပျော်ဖို့ကောင်းတာပေါ့… ခက်တာက တောင်ပေါ်လည်းရောက်ရော… အုပ်စုကလည်းတောင့် ၊ ဘုရားဖူးတွေကလည်းအရမ်းများနဲ့ တည်းဖို့နေရာအတွက် အခက်ကြုံပါရော… နောက်ဆုံးကျတော့ ရှာတော့တွေ့ပါရဲ့… ဘုန်းကြီးကျောင်းက အခုမှဆောက်လက်စကြီး… ကျန်တဲ့တည်းခိုခန်းတွေကလည်း အကုန်လုံးလူတွေကအပြည့်နဲ့ဖြစ်နေပါတယ်… ဒီတော့ အဲဒီ့ဘုန်းကြီးကျောင်းမှာ တည်းရင်တည်း ၊ မတည်းလို့ကတော့ ရင်ပြင်တော်မှာပဲ ဒီအတိုင်းကွေးရတော့မယ့် ဒီဇိုင်းပေါ့… ရွေးစရာလည်းမရှိတော့ နောက်ဆုံးအဲဒီ့မှာပဲ သောင်တင်ရောဆိုပါတော့… ဘုန်းကြီးကျောင်းကလည်း ဆောက်လက်စဆိုတဲ့အတိုင်း အင်္ဂတေတောင် မကိုင်ရသေးပါဘူး… ကြမ်းပြင်မှာလည်း ဘိလပ်မြေအမှုန့်တွေ ပွကျဲလို့… အဲဒီ့အပေါ်မှာ အကွက်ကျဲကျဲနဲ့ ဖျာကြမ်းတချပ်ပဲ ခင်းထားတာပါ… ရောက်စကတော့ ဘယ်သတိထားမိမလဲနော်… ညရောက်လို့ အိပ်မယ်ဆိုတော့မှ ဒုက္ခနဲ့ လှလှတွေ့တော့တာပဲ… လေတွေတရဟောတိုက်ပါတယ်ဆိုမှ ခေါင်မိုးကလည်း ဟောင်းလောင်းပေါက်… စောင်တွေဘာတွေကလည်း ဒီလောက်ထိမထင်ထားတော့ အလုံအလောက်ဘယ်ပါပါ့မလဲ… ကဗျာတော့ဆန်သား… လှဲနေရင်းမော့ကြည့်လိုက်ရင် ကြယ်လေးတွေက တဖျတ်ဖျတ်နဲ့… ဒါပေမဲ့ အဲ့ဒီ့အချိန်မှာ ကဗျာဆန်တာတွေ ဘာတွေ အသာထား… ဘာဖြစ်ဖြစ်မခံစားနိုင်ပါဘူး… သွေးခဲအောင်အေးတယ် ၊ အရိုးကွဲအောင်အေးတယ် ၊ မေးရိုက်အောင်အေးတယ် ဆိုတာ ဒါမျိုးပဲနေမှာလို့တောင် စဉ်းစားမိတယ်… ကားစီးလာရတာရော ခရီးပန်းတာတွေရောကြောင့် နှစ်နှစ်ခြိုက်ခြိုက်အိပ်မောကျသင့်ပေမဲ့… ကျမ မှေးခနဲ အိပ်ပျော်သွားရင် အလွန်ဆုံးနာရီဝက်ပဲ… ပြန်နိုးလာပြီး ချမ်းစိမ့်တက်လာလိုက်တာ ဘယ်နားကဘယ်လိုအေးမှန်း မသိကိုအေးတယ်… ဘယ်လိုမှ မတတ်နိုင်တဲ့အဆုံးကျတော့ ငုတ်တုတ်ထိုင်ပြီး ကိုယ့်ဒူးကိုယ်ပြန်ဖက်ထားရတယ်… အခန်းထဲမှာက မိန်းကလေးတွေစုအိပ်ကြတာ ကျမအဒေါ်အပါအ၀င် ခြောက်ယောက်လောက်ရှိပါတယ်… ထိုင်နေရင်းနဲ့ ဘေးဘီကိုကြည့်မိတော့ အော်… အကုန်လုံးအိပ်မောကျလို့… ကျမမှာသာ ခြေဖျားတွေပါအေးစက်လို့ ထုံကျင်ကျင်ကြီးတောင် ဖြစ်လာသလိုပဲ… ကျမတယောက်ထဲ အချမ်းပိုပြီး အိပ်မပျော်နိုင်ပဲ ငုတ်တုတ်ဖြစ်နေတာ… ကျမအဒေါ်မဟုတ်တဲ့ နောက်အန်တီကြီးတယောက်ဆိုရင် ဟောက်လိုက်တာမှ အသံကြီးကိုဟိန်းလို့… တိတ်ဆိတ်ပြီး မေးရိုက်အောင် ချမ်းနေတဲ့ ညသန်းခေါင်မှာ မနာလိုဖြစ်ချင်စရာကောင်းလောက်အောင် ဟိန်းနေတဲ့ ဟောက်သံကြီးရယ် ၊ ဘယ်လောက်ပဲလှလှ မခံစားပေးနိုင်ခဲ့တဲ့ ကောင်းကင်ကျယ်ကြီးရဲ့အောက်မှာ ကျမတယောက်တော့ ငုတ်တုတ်ထိုင်နေရင်းနဲ့ မနက်လင်းခဲ့ရတယ်…

အရုဏ်တက်ပြီး နေစထွက်တဲ့ အချိန်ကျမှ နဲနဲနွေးသွားပြီး ကျမအိပ်မောကျသွားတော့တယ်… နောက်တနေ့ကျတော့မှ တည်းခိုခန်းတခုက အခန်းလွတ်လို့ အဲဒီ့ကို ပြောင်းရတယ်… ပထမဆုံး ညတုံးကလောက်တော့ မခံစားရတော့ဘူးပေါ့လေ…

အခုစာရေးနေရင်းနဲ့ ပြန်စဉ်းစားကြည့်တော့ကျ အဲဒီ့တုံးက ချမ်းခဲ့တာ ပေါ့ရွှတ်ရွှတ်ကြီးဖြစ်နေသလိုပဲ… သောက်လက်စ juice ခွက်နဲ့ ယပ်တောင်ကိုတလှည့်စီ ကြည့်ပြီး ရေးရင်းနဲ့ ပြုံးစိစိတောင် ဖြစ်မိပါတယ်…။

ကျမအကြိုက် music bandများ

ခုတလော စိတ်တွေရှုပ်ထွေးနေလို့ ရီစရာလေးတွေ မရေးနိုင်ဘူးဖြစ်နေပါတယ်... ရေးပြီးသားကို ပြန်ဖတ်ကြည့်ပြန်တော့လဲ အသက်မပါသလိုကြီး ဖြစ်နေတယ်... ဒါကြောင့် ဒီတခေါက်တော့ ကျမ အကြိုက် music band တွေရဲ့ အကြောင်းလေးတွေ တင်လိုက်ပါတယ်... အားလုံးကို တောင်းပန်ပါတယ်နော်... ဒါပေမဲ့ မကြာခင်မှာ ဂွီ ဂေါ် အစီအစဉ်ကို တတ်သမျှမှတ်သမျှလေး ရေးပြီး ဆက်တင်သွားမှာပါ... ကျေးဇူးတင်ပါတယ်ရှင်...




ပထမဆုံး ကျမအကြိုက် bandလေးတွေနဲ့ မိတ်ဆက်ပေး ပါရစေနော်... သူတို့ သီချင်းလေးတွေ နားထောင်ကြည့်ချင်ရင် ကျမရဲ့ play list ထဲမှာ နားထောင်လို့ ရပါတယ်ရှင်... ဒီ band လေးကတော့ Plain White T's ပါ... Hey There Delilah သီချင်းလေးရဲ့ ပိုင်ရှင်ပါ...







နောက် တဖွဲ့ကတော့ The Click Five ပါ... ကျမ play list ထဲက Jenny သီချင်းကို ဆိုတဲ့ အဖွဲ့လေးပါ... vocal အသစ် ပြောင်းသွားတဲ့ bandဖြစ်ပါတယ်...












ဒီ bandလေးကတော့ Cobra Starship ပါ... ကျမ play list ထဲက Church of Hot Addiction သီချင်းဆိုတဲ့ band ပါ... ဒီband မှာ မိန်းကလေး တယောက်က keyboard တီးပါတယ်... ဒီvocalက ရုပ်ရှင်ကားတကား ဖြစ်တဲ့ Snake on The Plane ထဲက ဇာတ်ဝင်တေးကို ဆိုပေးခဲ့သူလည်း ဖြစ်ပါတယ်...





Stolen သီချင်းကို ဆိုထားတဲ့ Dashboard Confessional ပါ...












Paramore ပါရှင်... မိန်းကလေး vocalist နဲ့ ဒီ band လေးဟာ သံစဉ် ခပ်ကြမ်းကြမ်း ကိုမှ ကြိုက်သူတွေ အတွက် ပိုအဆင်ပြေမှာပါ... ကျမစ်ိတ်ညစ်တိုင်း နားထောင်တတ်တာက Paramore ရဲ့ Pressure ပါရှင်...








Shiny Toy Guns ပါ... သူတို့ရဲ့ Le Disko သီချင်းလေးနဲ့ ကလိုက်ကြရအောင်... :P











မကြာသေးမီက album အသစ်ထွက်ထားတဲ့ The Used ပါ... ကျမ play list ထဲက Smother Me သီချင်းလေးက ရှားရှားပါးပါးပါ... သူတို့ bandရဲ့ အခြားသီချင်းများနဲ့ မတူတဲ့ အဲဒီ့သီချင်းအေးလေးကို နားထောင်ကြည့်ပါဦးနော်....













ကျမ အတော်ကြိုက်တဲ့ band ပါ... Panic! At The Disco တဲ့... Fever You Can't Sweat Out ဆိုတဲ့ album တခုပဲထွက်ရသေးတဲ့ သူတို့ band ရဲ့ အောင်မြင်မှုကလည်း မသေးပါဘူး...









Evanescence ပါ... သူ့ရဲ့ Anywhere But Home ဆိုတဲ့ album ကို ဘယ်နှခေါက် ပြန်နားထောင်နားထောင် ကျမအတွက်တော့ မရိုးနိုင်ပါဘူး... နောက်ဆုံး album ဖြစ်တဲ့ The Open Door ဆိုလည်းကောင်းတာပဲ... သူမတူဇော်စိမ်းတောင် သူ့သီချင်းတွေကို ဂိုက်ပေးအကြမ်းစားနဲ့ ပြန်ဆိုနေတာ ကြားတော့ ကျမစိတ်ထဲမှာ နှမြောနေသလိုပဲ... ဘယ်တတ်နိုင်ပါ့မလဲလေနော်... own tune ကိုသိတာ လက်တဆုပ်စာပဲ ရှိတယ်ဆိုပြီး ပြောလို့ပြောနဲ့... ကိုယ်က အဲဒီ့လက်တဆုပ်ထဲပါနေလေတော့... :P



Bullet For My Valentine ပါ... album တခုထဲပဲ ထွက်ရသေးပါတယ် ... သူတို့သီချင်းတွေက ကျမ အကြိုက်ဆုံးကတော့ Tears Don't Fall, All These Things I Hate (revolve around me) နဲ့ Suffocating under Words of Sorrow ပါ...