.jpg)
ဟုတ်သည်။ သူမ အမှန်အကန် ငိုနေခြင်းဖြစ်သည်။ ချောမွေ့နေတဲ့ ပါးပြင်တလျှောက် မျက်ရည်တွေ တလိမ့်လိမ့် ကျဆင်းနေတာပင် အလွမ်းအဆွေး ကဗျာ တပုဒ်ကို ဖတ်ရှူနေရသလို အလွန် နှစ်လိုဖွယ်ကောင်းနေ၏။ အသနားခံနေတဲ့ မျက်ဝန်းညိုညိုမှာ မျက်ရည်ကြည်တွေ ၀ဲခိုနေ၍ ထင်သည်… မျက်လုံးအိမ်မှာ အရောင်ဆန်းတို့ တဖျတ်ဖျတ်လက်လို့… ။ ရှိူက်သံ တချက်နှင့် အတူ စကားလုံးတို့ အမှားအယွင်း အထစ်အငေါ့ မရှိ ထွက်ကျလာ၏။ တုန်ရီနေသော နှူတ်ခမ်းနှင့် စည်းဝါးကိုက်စွာ ယှဉ်တွဲပါလာသော လူတိုင်းနီးပါး အလွတ်ရပြီးသား စာသားအချို့…
` ကို… ငါ့အတွက် နင်မရှိလို့ မဖြစ်ဘူး… ငါ့ကိုမထားခဲ့ပါနဲ့ … ´
သူမ တားနေသည့်ကြားက သူ ကျောခိုင်း၍ ဆက်လျှောက်သွားလေ၏။ မျက်ဝန်းအိမ်ကို စုံမှိတ်ပြီး နှူတ်ခမ်းကို ခပ်တင်းတင်းကိုက်ကာ အလှပဆုံး ဆက်၍ ငိုကြွေးပြန်သည်။
` ကဒ်….. ´
ချီးကျူးသံများ၊ အားရ ကျေနပ်သံများကြားမှ သူမ တိုးထွက်လာခဲ့၏။ ခုနက ကြည့် အကောင်းဆုံးဖြစ်အောင် သူမ ငိုကြွေးခဲ့ရသော မျက်ရည်များအား တစ်ရှူးစဖြင့် အသာတို့ဖျက်လိုက်သည်။ ရင်ထဲမှာက ဘာနဲ့မှ မတူတဲ့ ၀မ်းသာကြည်နူးမှုနှင့် အတူ လက်ကိုင်ဖုန်းမှ ခေါက်ရိုးကျိုး ဖုန်းနံပါတ်တခုကို နှိပ်မိပြီးသား….
` ဟဲလို .. မောင်လား… ။ တို့ ဒီမနက်ပဲ ရှူတင် မသွားခင် ဆေးခန်းမှာ ၀င်စစ်ခဲ့တယ်။ သေချာတယ်မောင်ရဲ့… ။ တို့ သိသိချင်းကထဲက အရမ်းဝမ်းသာပြီး ဖုန်းဆက်နေတာ…… မရလို့… အင်း… ဟုတ်တယ်…. အခု တဆင်းန်တောင် ပြီးသွားပြီလေ… မောင့်ကိုလည်း ၀မ်းသာစေချင်လို့… ………………………. ………………………………. ………………………… ………………. ´
ဟုတ်တော့ ဟုတ်သည်။ သူမ အမှန်အကန် ငိုခဲ့ခြင်း ဖြစ်သည်။
~ ~ ~ ~ ~
သူမ လုံးဝ မငိုပါ။ ဒါကိုပဲ ဘေးမှ အားမလို အားမရနှင့် ` ငိုချလိုက်လေ… ပေါ့သွားအောင် ငိုချပစ်လိုက်.. ကျိတ်ပြီး တင်းမထားနဲ့… စိတ်ကို လျှော့လိုက် ´
သူမ စိတ်ကို လျှော့ချလိုက်ပါသည်။ သို့သော် မျက်ရည်တော့ ကျမလာဘဲ သက်ပြင်းတချက်သာ လေထဲ အငွေ့ပျံသွားပြန်၏။ ကာယကံရှင် သူမက သက်ပြင်းတွေသာ အကြိမ်ကြိမ် မှုတ်ထုတ်နေပေမယ့် သူ့ဟာနဲ့ သူတော့ အဆင်ပြေနေသား… စီကာ ပတ်ကုံး ပြောပြီး အလွမ်းသယ်ပေးနေသည့် တစ်ဦးဦးက ရှိနှင့်နေပြီးသား…
` အောင်မလေး… သေနေလိုက်တာများ… အိပ်ပျော်နေတာကျနေတာပဲ… ထကြည့်ပါဦးဟဲ့… နင် ချစ်တဲ့ နင့်မိန်းမနဲ့ သမီးလေးကို… ………………. ……………… ´
( မှတ်ချက်။ ။ ငိုသံကြီးဖြင့် ဖတ်ရန်။ ရန်တွေ့ နေခြင်းမဟုတ် )
တဖြောက်ဖြောက် ကွာစေ့ကိုက်သံ… ဟိုတစု ဒီတစုလူတွေရဲ့ တယောက်တပေါက် ( နှစ်ယောက် နှစ်ပေါက် ) စကားသံ အချို့… လူသံ ဆူဆူညံညံကြားထဲမှာပင် စားပွဲလေးချကာ စာကျက်နေသော သမီးငယ်… ဘေးမှ ပေါ့သွားအောင်ဟု ဆိုကာ ငိုချင်းချခိုင်းနေသော တိုက်တွန်းမှု…. ။ အလှည့်ကျ ပြန်လည်ပတ်လာသော အခန်းကျဉ်းလေးထဲမှ ထိုအသံများကြောင့် သူမ နံရံကို ခေါင်းမှီပြီး မျက်စိ တချက်မှိတ်လိုက်မိသည်။ ခင်ပွန်းကိုပဲ အားကိုးလာခဲ့သော သူမအဖို့ ရှေ့လျောက် မည်သို့ ခရီးဆက်ရမည် မသိ… ။ သမီးငယ်လေးနှင့် ကျန်ရစ်ခဲ့ရမယ့် သူမရဲ့ မုဆိုးမ တယောက် ဘ၀အစ… ။
သူမကို အချို့က မေးငေါ့ချင်ကြ၏။ ခင်ပွန်းဆုံးပါးတာတောင် မျက်ရည်မကျလို့တဲ့လေ။ တကယ်လည်း သူမ အခုအချိန် မငိုနိုင်… ။ ရှေ့ဆက်လျှောက်ရမယ့် အမှောင်လမ်းအတွက် သူမငိုရဦးမှာ မလွဲဧကန်ဖြစ်သည်။ မျက်ရည်တွေ ချွေတာ စီစစ်နေတယ်ပဲ ပြောပြော… ဘယ်လိုမိန်းမစားလည်း မသိဘူးလို့ပဲ ဝေဖန်ပါစေဦးတော့… ဆက်သွားရမယ့် ခရီးလမ်းမှာ ထိုသူများ ဘေးမှ လိုက်ပါမည်မဟုတ်ကြောင်း သေချာနေမှတော့……
` ငိုချင် ငိုချလိုက်ပါလေ… အဲ့လိုပဲ အံချည်း ကျိတ်မနေပါနဲ့အေ့…… ……………………… ………………. ´
သို့သော်…. သူမ လုံးဝ မငိုဖြစ်ခဲ့ပါ။
( ထို အခိုက်အတန့် ခဏ အတွင်းကိုသာ ရေးဖွဲ့ထားခြင်းဖြစ်သည်။ နောက်ကွယ်ကျမှ သူမ ကျိတ်ငိုနေမလား မငိုဖြစ်ဘူးလား စသည့် အပိုင်းများမှာ ယခု စာပုဒ်နှင့် လုံးဝ မသက်ဆိုင်ပါ။ )
~ ~ ~ ~ ~
သူမ မငိုမိအောင် ကြိုးစားနေ၏.. ။ သို့သော် မျက်ရည်တို့က မျက်လုံးထောင့်စွန်း နှစ်ဖက်မှ အပြိုင် လိမ့်ဆင်းလာကြသည်။ ငိုမိမှာ စိုး၍ စိတ်ပြောင်းသွားအောင် နားထောင်နေသော သီချင်းသံတို့ နားထဲ လုံးဝ မတိုးဝင်နိုင်တော့…. လှဲနေရင်းနှင့် ကျလာရသော မျက်ရည်တို့၏ လမ်းဆုံးကား………… သူမကိုယ် သူမ ငိုနေတာ သတိထားမိတော့ ခေါင်းအုံးမှာ မျက်ရည်တွေ ရွဲစိုနေခဲ့ပြီးသားဖြစ်၏။
ဟန်ဆောင်ခြင်းကို အလွန်မုန်းသော သူမဖြစ်သည်။ အခုငိုနေရခြင်းမှာ ဟန်မဆောင်ခဲ့မိသည့် အတွက် နောင်တရနေခြင်းလား…. ။ ဟန်မဆောင်ချင်ပါလျက်နဲ့ ဟန်ဆောင်ရတော့မည့် အတွက် ၀မ်းနည်းနေခြင်းလား… မည်သူမျှ မသိနိုင်… ။
လောကကြီးထံမှ ဘုန်းပေါလအော သင်ယူ၍ ရနိုင်သော သင်ခန်းစာများထဲမှ သူမ မနှစ်သက်ဆုံး ဟန်ဆောင်ခြင်း ဘာသာရပ်ကို မသင်ယူခဲ့မိသည့်အတွက် အခု သူမ ငိုနေရပြီ… ။ သူမ ကျော်ဖတ်မိခဲ့သော စာမျက်နှာများမှ ပေးသော သင်ခန်းစာမှာ သူမအတွက် အနည်းငယ် ခါးသီး၏။
အများအတွက် ရီစရာ ကိစ္စတခုဟာ သူမရဲ့ ပုဂ္ဂလိက ခံစားချက်အရ ငိုကြွေးစရာ ဖြစ်နေပါက သူမရောယောင်၍ ဟန်ဆောင် မပြုံးပြ တတ်ခဲ့ပါ။ ခပ်ပေါ့ပေါ့ ပျော်ရွှင်စရာ ကိစ္စတခုအား လွတ်လွတ်လပ်လပ် မပျော်ရွှင်ပါဘဲ ကြိတ်မှိတ်အောင့်အီး၍ မဲ့ပြရအောင်ကလည်း သူမဟာ သရုပ်ဆောင် ၀ါသနာပါသူ တယောက်မဟုတ်ခဲ့။ ကိုယ်ပိုင် မဟုတ်သော ကြေးစားခံစားချက်မျိုး မရှိကောင်းဟု ခံယူထားသော သူမ၏ အတွေးအား မှားလား မှန်လား ဆုံးဖြတ်ပေးနိုင်မည့် သမာဓိရှိသော ဒိုင်လူကြီးမျိုး ဒီကမ္ဘာပေါ်တွင် မပေါ်ထွန်းလောက်သေး… ။
ဟန်ဆောင်ခြင်း အလျှင်းမပါပဲ… စိတ်အားငယ်ခြင်း၊ နားမလည်နိုင်ခြင်း၊ ထိတ်လန့်ကြောက်ရွံ့ခြင်းများဖြင့် သူမ သည်းထန်စွာ ငိုကြွေးနေသည်။
သူမ မငိုမိအောင်တော့ ကြိုးစားခဲ့ပါသေး၏… ။
Subscribe to:
Post Comments (Atom)
No comments:
Post a Comment